Հայաստանի Հանրապետության Անկախության 30-ամյակի կապակցությամբ դեսպան Յուրի Բաբախանյանի ուղերձը

21 սեպտեմբերի, 2021

Տիկնայք և պարոնայք,

Այսօր մենք տոնում ենք Հայաստանի Հանրապետության Անկախության 30-րդ տարեդարձը: Այս նշանավոր կապակցությամբ շնորհավորելով բոլորիս՝ առաջին հերթին գլուխ եմ խոնարհում Անկախության համար մարտնչած և Անկախության երեսունամյա պատմությունը կերտած հերոսների առջև:

Անցած 30 տարիների ընթացքում մենք դիմագրավեցինք բազմաթիվ մարտահրավերների՝ պատերազմներ, շրջափակում, էներգետիկ և տնտեսական ճգնաժամ և այլն.:

Սակայն, համոզված եմ, որ այդ դժվարությունները չեն կարող կոտրել 5000 տարվա պատմություն ունեցող և շատ ավելի մեծ փորձություններով անցած հայ ժողովրդին։

Ինչպես անկախության ձեռք բերման բախտորոշ օրերին և դրան հաջորդող դժվար տարիներին, այսօր էլ մեր պետության առջև կան մարտահրավերներ, որոնց հաղթահարման բանալին գտնվում է բացառապես մեր ձեռքերում։ Այսօր ամեն հայ աշխարհի ցանկացած անկյունում պետք է նպաստի Հայրենիքի հզորացմանն ու զարգացմանը:

Այսօր, ավելի քան երբևէ, մեզանից յուրաքանչյուրը պետք է գիտակցի իր պատասխանատվությունը՝ անշեղորեն և հետևողականորեն պահպանելու և ամրապնդելու Հայաստանի անկախությունը, պետականությունն ու ինքնիշխանությունը:

Պատմությունը մեզ չի ների, եթե լիարժեք չօգտագործենք ժամանակակից դեմոկրատական պետություն ստեղծելու մեզ տրված բացառիկ հնարավորությունը: Մենք չենք վախենում մարտահրավերներից և պատրաստ ենք դրանց դիմակայել:

Սիրելի բարեկամներ, իր հազարամյա պատմության ընթացքում հայ ժողովուրդը բազմիցս ապացուցել է սեփական հողի վրա խաղաղ ապրելու և արարելու իր անկոտրուն կամքը:

Մեր երազանքն է՝ կառուցել դեմոկրատական և խաղաղասեր պետություն, սակայն դա չի նշանակում, որ մենք չենք կարող պաշտպանել մեր Հայրենիքը և ապագան արտաքին ոտնձգություններից:

Համոզված եմ, որ մեր ժողովրդի հավաքական ներուժի և մեր իրական դաշնակիցների հետ համագործակցության շնորհիվ մենք կհաղթահարենք մեզ պարտադրված բոլոր մարտահրավերները և ուժեղ, արդար և բարեկեցիկ երկիր կկերտենք ներկա և գալիք սերունդների համար:

Կեցցե՛ անկախ Հայաստանի Հանրապետությունը: Կեցցե՛ մեր ժողովուրդը Հայաստանում, Արցախում և Սփյուռքում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր